སྐལ་བཟང་མཐུ་སྟོབས།
མིང་གཞན་བག་གྲོ། སྐྱེས་ཡུལ་ལྷ་ས་གྲོང་ཁྱེར་སྟོད་ལུང་བདེ་ཆེན་རྫོང་ཁོངས་ཀྱི་སླེའུ་ཤང་སྟག་སྡོང་གྲོང་ཚོ་ནས་ཡིན། ཕྱི་ལོ་༡༩༨༠ ལོར་འབྲས་སྤུངས་དགོན་པར་གྲྭ་བ་བྱས། ཕྱི་ལོ་༡༩༨༧ ཟླ་༩ ཚེས་༢༧ ཉིན་ལྷ་སར་བོད་རང་བཙན་གྱི་རྔམ་སྟོན་ཁྲོམ་སྐོར་གྱི་ལས་འགུལ་སྤེལ་སྐབས་རྒྱ་གཞུང་གིས་འཛིན་བཟུང་བྱས་ཏེ་ལྷ་ས་གྲོང་ཁྱེར་སྤྱི་བདེ་ཅུས་ལྟ་སྲུང་ཁང་དུ་ཟླ་༤ ཙམ་རིང་བཀག་ཉར་བྱས་རྗེས་གློད་གྲོལ་བཏང་། དེའི་རྗེས་སླར་ཡང་བོད་རང་བཙན་གྱི་ཡིད་ཆ་འགྲེམ་སྤེལ་དང་། བོད་རང་བཙན་གྱི་ཚོགས་པའི་ནང་ཞུགས་པ། དེ་བཞིན་རྒྱལ་མཚམས་བརྒལ་བ་སོགས་ཀྱི་གནས་ཚུལ་འོག ཕྱི་ལོ་༡༩༨༩ ཟླ་༥ ཚེས་༡༣ ཉིན་འགྲམ་འགག་སྒོ་ནས་འཛིན་བཟུང་བྱས། ཕྱི་ལོ་༡༩༨༩ ཟླ་༡༡ ཚེས་༢༨ ཉིན་ལྷ་ས་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གི་ལྷ་ས་གྲོང་ཁྱེར་སྲིད་གཞུང་གི་ཚོགས་ཁང་ནང་དུ་མི་དམངས་༡༥༠༠ ཙམ་ཞུགས་པའི་བཅད་ཁྲ་ཡོངས་བསྒྲགས་ཀྱི་ཚོགས་ཆེན་ཐོག་མི་ལོ་༡༨ དུས་བཙོན་དང་ཆབ་སྲིད་ཀྱི་ཐོབ་ཐང་ལོ་༥ འཕྲོག ཕྱི་ལོ་༡༩༩༠ ཟླ་༡ ཚེས་༡༤ ཉིན་བོད་རང་སྐྱོང་ལྗོངས་ཀྱི་གྲྭ་བཞི་བཙོན་ཁང་དུ་བཙོན་འཇུག་བྱས། ལྟ་སྲུང་ཁང་དང་བཙོན་ཁང་དུ་མནར་གཅོད་བཏང་རྐྱེན་ཕྱི་ལོ་༡༩༩༦ ཟླ་༦ ནང་བཙོན་ཁང་ནས་སྨན་ཁང་དུ་འབྱོར་བའི་ཉིན་གཉིས་པར་རྐྱེན་འདས་སུ་གྱུར་ཡོད།
